તમારે દિલ્હી જવું હોય તો જ, અમારે એમ.પી. નથી જવું!

ટાઢા પોરે – કૌશિક મહેતા

માનનીય મુખ્યમંત્રી શ્રી નરેન્દ્રભાઈ મોદી,

આવું સંબોધન કરવા પાછળ કારણ એટલું જ કે આપે આપણા બધા મંત્રીઓને અને હોદેદારોને કોઈ પણ જગ્યાએ કોઇપણ કાર્યક્રમ કે પછી મીડિયા સાથેની વાતચીતમાં બોલતી વેળા આ રીતે જ શરૂઆત કરવાનું કહ્યું છે એવી અમને ખબર છે અને એટલે અમે પણ એ જ રીતે વાત કરીશું.

હવે સીધી વાત પર આવીએ કારણ કે આજકાલ આપ બહુ બીઝી રહો છો.આપની પાસે માત્ર હવે ગુજરાતનો જ પોર્ટફોલિયો નથી , હવે આપ દેશનું ઋણ ચૂકવવા માગો છો.અમે બહુ રાજી છીએ પણ સાહેબ , અમારી વાત કાને ધરજો.ભલે અમે આપણે વોટ આપ્યા નથી.પણ આપ કહેતા હતા કે એક દિવસ તમે જાગો , પાંચ વર્ષ હું જાગીશ.... તો સાહેબ હવે જાગો અને તમારા લોકોને જગાડો.આ મધ્ય પ્રદેશવાલા અમને અહી ગીરથી કુનો લઇ જવા માગે છે.કુનો વિષે અમે કાઈ જાણતા નથી.અમારા દાદા કે પરદાદા પણ ત્યાં ગયા નથી.તો પછી અમારે શા માટે જવાનું? અમારો વાંક શું , ગુનો શું?

સાહેબ , અમે આમ તો જંગલના રાજા ગણાઈએ છીએ.પણ અહ્વે જંગલમાં પણ અમારું રાજ રહ્યું નથી.તમારુ રાજ તો તપે છે.અને અમે તો તમે કહો ત્યારે દર્શન આપીએ છીએ.ધારાસભ્ય કે સંસદ સભ્ય જેવું અમારું નથી.અમિતાભ બચ્ચન આવે કે આમ આદમી અમે બધાને સરખી ટ્રીટમેન્ટ આપીએ છીએ.બધાને અમારા દર્શન કરવા દઈએ છીએ.અને અમે સાંભળ્યું છે કે અહ્વે તો અમારા દર્શન થકી સરકાર માઈ બાપને આવક પણ અઢળક થાય છે.તો પછી અમને આવો અન્યાય શા માટે? અમે તો કદી આપની પાસે પેલા સીમાંકનના ફેરફાર બાદ કેટલાકે અન્યત્રે ટીકીટ માંગી અને તમે કેટલાકને આપી , કેટલાકને ના આપી પણ અમે અતો એવી ય માગણી કદી કરી નથી.અને ચાલો અમારું ક્ષેત્ર બદલવું હોય તો આટલામાં બદલો ને ?આમે ય હવે અમે ગીરની બહાર તો નીકળી જ ગયા છીએ.અને અમને જે તે વિસ્તામાં ફાવી પણ ગયું છે.બીજા કેટલાક વિકલ્પો પણ આપની પાસે છે.પણ અહીંથી છેક મધ્ય પ્રદેશના કુનોમાં અમને તગેડી મુકવાના?

સાહેબ અમે તો સત્તાવાર કરતા બિનસત્તાવાર વધુ મોજ કરાવીએ છીએ.એનું અમે કદી ખોટું ય લગાડ્યું નથી? આ તમે માલધારીઓને ગીર બહાર કાઢી મુક્યા, એના કારણે અમને કેટલી બધી તકલીફ પડે છે.અમારે શિકાર માટે બહાર જવું પડે છે.અને એમાં અમે બહુ વ્ગોવાઈએ છીએ.અમે છતાં કાઈ નથી બોલ્યા. આ કેટલીક કંપનીવાળા ગીર ફરતે ગેરકાયદે ખોદકામ કરી અમારી ગીરની શાંતિમાં ગાબડા પાડે છે , અમે કોઈ ફરિયાદ કરી? કેટલાકે અમારો શિકાર કર્યો અમે કદી કોઈ ફરિયાદ કરી?અમે ટ્રેન  નીચે કપાયા તોય અમે ચુપ રહ્યા.આમ છતાય અમને અહીંથી બહાર મોકલવામાં શા માટે આવે છે?

ગીરમાં પાણીની સમસ્યા છે, ખાનપાનની સમસ્યા છે. એ બધું અમે ચલાવી લઈએ છીએ.અમારા બધા ફોટા પાડે છે, ફિલ્મ બનાવે છે,પુસ્તકો લખે છે, અમારા પર રીસર્ચ થાય છે.અમે કદી કોઈ રોયલ્ટી માંગી? અમારી વસ્તી ગણતરી થાય ત્યારે પણ એમાં કોઈ ગોલમાલ કરતા નથી.આ જંગલવાળા અમે કહીએ તેમ કરીએ છીએ.શક્કરબાગમાં હોઈએ કે પછી અન્ય ઝૂમાં , અમને ખાવાનું પૂરતું મળે ના મળે અમે કશું કહેતા નથી.અમે કદી કોઈ માનવને ખોરાક બનાવતા નથી.હા, પશુઓ અમારો ખોરાક છે.એ માટે પણ અમારે બહુ મહેનત કરવી પડે છે.જેમ ગામડાની મહિલા પાણીના એક બેડા માટે બે પાંચ કિલોમીટર રખડે છે એવી જ કાઈ અમારી હાલત છે.અમે તો સાંભળ્યું છે કે માણસ પણ સામાજિક પ્રાણી છે અને છતાં અમે એને ખોરાક બનાવ્યો નથી.અમારી આ બધી સારી સારી બાજુઓને ધ્યાનમાં લેજો.

અને સાહેબ , તમે જ કહો છે કે અમે સૌરાષ્ટ્રની , ગુજરાતની જ નહિ પણ દેશ દુનિયાની શાન છેએ.અને છતાં ય અમને અહીંથી બહાર મોકલવાની વાત શા માટે? તમે અમારા વતી સુપ્રીમ કોર્ટમાં જરા સરખી રજૂઆત કરો ને? અને અમારામાંથી સરકારને તગડી આવક થાય છે એમાંથી થોડા રૂપિયા વકીલોને પણ આપો એ અમારો કેસ બરાબર રજુ કરશે તો અમારે અમારું ઘર બદલવું નહિ પડે.અમને અહી અને અહીના માણસો સાથે બહુ ગોઠી ગયું છે.અમારે બહાર જવું નથી.અમને અહી તકલીફ છે પણ એ ભોગવી લઈશું પણ જીવીશું પણ અહી અને મરીશું પણ અહી.અમારે ક્યાંય જવું નથી.આપણે જવું હોય તો જાવ એમાં અમારી પૂરી પૂરી શુભકામના છે.

થોડું લખ્યું છે પણ ઝાઝું વાંચજો અને અમને બચાવી લેર્જો.

એ જ

ગીરના સિંહોના ઝાઝા ઝુહાર.