શબ્દોની વાત કરીએ તો શબ્દ એ સાતમાં માળેથી રોડ ઉપર ફેકેલા ઈંડા જેવો છે .તે પાછો નથી આવી શકતો .પત્રકારત્વમાં શબ્દ એ નોકરિયાત છે પણ કવિનો શબ્દ શબ્દકોશના શબ્દથી બિલકુલ અલગ છે . તમે કોઈને કવિતા લખતા શિખવી શકતા નથી .કવિતા ત્યારે જ લખી શકાય , જો શબ્દ સાથે તમે આજીવન પ્રેમમાં પડી ગયા હો .શબ્દો એ વૃક્ષના ફરકતા પાંદડાઓ જેવા છે , પણ એ વૃક્ષમાં સર્જકતાના ફળ બેસવા જોઈએ . આપણે ઘણીવાર કવિની અતિ સ્તુતિ કરવામાં વિવેક ચુકી જઈએ છીએ .એક સરસ કવિ વિષે એમ કહેવાયું કે " એને ત્યાં ગુજરાતી શબ્દકોશ નોકરી કરેછે " આમાં નથી શબ્દનું ગૌરવ કે નથી કવિનું ગૌરવ ...આટલી પૂર્વભૂમિકા બાંધ્યા પછી મારે ગુજરાતી કવિતામાં જે નવા અવાજો સંભળાય છે એ કવિઓ વિષે થોડીક વાત કરવી છે .સાવરકુંડલાના ભરત વિંઝુડા ,રાજકોટના સંજુ વાળા , અમિત વ્યાસ ,અરવિંદ ભટ્ટ , લલિત ત્રિવેદી ,ખુબ સરસ અવાજો છે .તેઓ શબ્દ સાથે ભદ્ર વ્યવહાર કરે છે . અનિલ ચાવડા , ચંદ્રેશ ,પણ તરત યાદ આવી જાય છે .એમની પાસેથી ખુબ અપેક્ષા રાખી શકો . ભાવેશ ભટ્ટ , હરદ્વાર ગોસ્વામી ,ખુબ સરસ લખે છે . સરૂપ ધ્રુવ ખુબ જ સરસ લખેછે પણ તેઓ ભૂગર્ભમાં ચાલી ગયા છે . નવા અવાજોમાં એષા ધ્યાનપાત્ર છે .ગૌરાંગ ઠક્કર ,મકરંદ મુસળે ,વિવેક કાણે ,કિરણસિંહ ,મને ખુબ ગમતા કવિઓ છે .અમારા મુંબઈમાં સંદીપ ભાટિયા ની રચનાઓમાં ખુબ તાજગી અને નવીનતા દેખાય છે .મુકેશ જોશી અને હિતેન તો છેજ . એક નવું જ નામ હમણાં ફેસબુક પર જોવા મળ્યું તે શિવજી રૂખડા .આ કવિ વિષે હું બહુ જાણતો નથી પણ એની ગઝલ રચના હમણાજ વાંચી ગાયત્રી ભટ્ટ પણ સરસ લખેછે .અમેરિકામાં અભ્યાસ કરતા યુવાન કવિ ચિંતન શેલત ખૂબ આશા જન્માવે છે .મકરંદ મુસળે ,વિવેક કાણે મને ગમતા કવિઓ છે નરેશ ડોડીયા ઉર્જાથી છલકતા ઇન્સાન છે .અમેરિકામાં વસતી ધૃતિ અમીનની રચનાઓ ખુબ ધ્યાન ખેંચેછે .એમની ચરોતરી ભાષા અને સેન્સ ઓફ હ્યુમર આસ્વાદ્ય છે .નંદિતા ઠાકોર પણ આશા જન્માવે છે

.જિગર જોશી પણ ક્યારેક ક્યારેક ચમકારો મૂકી જાય છે .મને અનેક નવા મિત્રોના સર્જનમાં અપાર રસ છે .સોનલ પરીખ , આશા પુરોહિત પણ યાદ આવે .અહી હું નવા અવાજોની ડિરેક્ટરી દેવા નથી બેઠો જેટલા નામ હૈયે હતા તે હોઠે આવ્યા છે .અત્યારે ગઝલ બહુ લખાય છે એમાં નેવું ટકા ગઝલોમાં કાવ્ય સિદ્ધ થતું નથી .રજુઆતમાં ખુબ જ હિંસક ઝનૂન દેખાય પણ ગઝલમાં દમ ના હોય .ગઝલ એ વિચારનો અનુવાદ નથી છંદ અને બંધારણ બરાબર આવડી ગયું એનાથી કઈ મિર્ઝા ગાલિબ બની શકાતું નથી . સૌમ્ય જોશી આપની ભાષાનું એક જબરજસ્ત નામ છે .આ સર્જક કોઈ એક સાહિત્ય સ્વરૂપના બંદીવાન નથી થયા . હું કોઈ વિવેચક નથી . સમીક્ષક નથી . માત્ર ભાવક છું . મને ગુજરાતી કવિતાની આવતીકાલમાં શ્રધ્ધા છે .
સ્યાહી ડોટ મંચ પર જે કવિમિત્રો પોતાની રચનાઓ મોકલે છે એ વિષે હું મારો પ્રતિભાવ આપતો રહીશ .સહુ યુવાન કવિમિત્રોને મારે એટલીજ ટીપ્સ આપવાની છે કે મિટર અને લયને બરાબર નભાવે ,કોઈ સારા વિચારનો ગઝલના શેરમાં અનુવાદ કરી દેવાથી ગઝલ બનતી નથી .અભિવ્યક્તિમાં ફ્રેશનેસ જરૂરી છે .જગતના જે ઉત્તમ કાવ્યો છે એનું વાંચન પરિશીલન થવું સહુ માટે ખૂબ ઉપકારક નીવડશે એઝરા પાઉન્ડની આ સલાહ આપ સહુ સાથે શેર કરું છું "The secret of popular writing is never to put more on a given page than the common reader can lap off it with no strain whatsoever on his habitually slack attention." ઓલ ધ બેસ્ટ .ટેકકેર ...