જીતવું માણસનો સ્વભાવ છે. કોઈપણ ક્ષેત્રમાં સિદ્ધિ પ્રાપ્ત કરવી, સફળ થવું હર કોઈને પસંદ હોય છે. તમારી આવડત કૌશલ્ય દ્વારા રમત જીતી શકાય. વળી, પૈસાથી ભૌતિક સુખ પ્રાપ્ત કરી શકાય પરંતુ માણસને જીતવાનું સાધન માત્ર ને માત્ર પ્રેમ છે.

માનવમાત્રને પ્રેમ કરો. પ્રત્યેક જીવ પર કરુણા રાખો. સામેની વ્યક્તિ તમને ગમે તેટલી નફરત કરે પરંતુ આપણે પ્રેમનો પ્રવાહ અવિરત રાખવો. કોઈ પ્રત્યે દ્વેષભાવ ન રાખવો. પ્રેમથી કઠોરમાં કઠોર માણસના હૃદયમાં પરિવર્તન આવે છે. બસ, આપણો ભરોસો અકબંધ રાખવો.

લોકો ભલે તમારી ટીકા, અવગણના કે બુરાઈ કરે પરંતુ આપણે કરુણાનો માર્ગ ન છોડવો. લોકો કદાચ તમને મુર્ખ માને તો ભલે માને એ એમની માન્યતા છે.આપણે દરેક જીવ પ્રત્યે સહાનુભુતિ રાખવી. આ જગતમાં શાંતિ મેળવવા પ્રેમ સિવાય કોઈ વિકલ્પ જ નથી.

યુદ્ધનું પરિણામ અંતે હાર જ હોય કારણ એક જીતે તો બીજાની હાર થાય. કોઈને હરાવીને જીતી શકવાનું ગણિત જ ખોટું છે. આપણી જીતનું એક માત્ર સાધન છે પ્રેમ.

સૃષ્ટિના સર્વે જીવમાં ઈશ્વર વસેલો છે તેવું આપણા શાસ્ત્રો કહે છે એટલે સર્વે જીવને પ્રેમ કરવો એ જ ઈશ્વરની ભક્તિ છે. પ્રત્યેક જીવમાં ઈશ્વરના દર્શન કરી પ્રકૃત્તિ ના આ અલૌકિક સર્જનને આભારી રહી જીવન સાર્થક કરવું.

ટહુકો :

ઈશ્વરને પ્રિય થવું એટલે સૃષ્ટિના સમસ્ત જીવને પ્રેમ કરવો.

                                                                                                                                                     કેતન મોટલા ‘રઘુવંશી’