મારી વાત -61

''સમજદાર સાથીદાર''

દરેક માણસને પોતાનું જીવન સુખ,શાંતિ અને આનંદ પૂર્વક જીવવા મળે તેવી ઝંખના રહેતી હોય છે. જીવનપથ પર દરેક સંજોગો અને સમસ્યામાં સદા સાથ ચાલે તેવા સાથીદાર જરૂર રહે છે. સમજદાર સાથી જીવને ને શ્રેષ્ઠ અને અંતિમ મુકામ પર લઇ જાય છે.

સમજદાર સાથીદાર જીવનના કઠીન માર્ગો પર સ્નેહરૂપી ફુલો પાથરી માર્ગને સરળ અને સફળ કરી શકે છે. સંકટની ઘડીમાં માર્ગદર્શક બની આત્મવિશ્વાસ દ્રઢ બનાવે છે.

આપણે ક્યારેક આપણાં જીવનસાથી ,પ્રેમી કે મિત્રની પસંદગી કરવામાં થાપ ખાઈ જઈએ છીએ. વધારે પડતા આવેશમાં આવી ઉતાવળાં પગલા ભરી ખોટી પસંદગી કરીએ છીએ પરિણામે જીવનભર પસ્તાવાનો વારો આવતો હોય છે.

તમારો સાથીદાર સમજદાર,શાંત,ભલાઈ કરનાર,ઉદાર હૃદયી, સંવેદનશીલ, તેજસ્વી,વિનમ્ર , રમુજી અને ઈશ્વરમાં આસ્થા ધરાવનાર હોવા જોઈએ.કારણ આપણે જેને પસંદ કરતા હોઈએ છીએ તે શીલવાન અને ગુણીયલ હશે તો આખી જીંદગી સુખ મળતું રહેશે.

ઘણીવાર એવું બને કે આપણે આવા ગુણવાન અને સમજદાર સાથી મળી જાય પરંતુ આપણે તેને લાયક ન હોઈએ તેવું પણ બને એટલે તમારી અપેક્ષાઓને વાજબી ઠેરવવા પ્રથમ તો તમારે ગુણવાન, શીલવાન, સરળ,સહજ અને સર્વસ્વીકૃત બનવું રહ્યું.

પરમકૃપાળુ પરમાત્મા પર દ્રઢ શ્રદ્ધા રાખી જીવનને ઉન્નત દિશામાં ચાલતા રહેવું. ખબર નહિ જીવનના ક્યાં મુકામે યોગ્ય સાથી મળી જાય તેનો ઈતજાર કરવો. ધીરજપૂર્વક અને નિષ્ઠાપૂર્વક કાર્ય કરતા રહેવું. આ જગતમાં ક્યાંક તો તમારી પસંદગી અને તમને પસંદ કરતી વ્યક્તિ હોય જ છે.

ટહુકો :

જીવનમાં વધુ પડતી અપેક્ષાઓ દુઃખ આપે છે,
માણસને તેની લાયકાત કરતા વધુ મળતું નથી.

કેતન મોટલા 'રઘુવંશી'

લખ્યા તા. 22/07/2015