~~..સુખની સુગંધ..~~



ગંધ જો રહે પટલોમાં બંધ

કેમ કરી પામે મરુતનો સંગ?

કળીનું જોબન કરશે તેણીના સરવાનો પ્રબંધ..!!



વરે એ જ્યારે સુખને સંગ

અજરઅમર થાય,પમરે સુગંધ

ચિત્ત મોહવાનો કસબ નિજ હસ્તક અકબંધ..!!



દુઃખનો જો ઘડીક ચઢે રંગ 

ભટકે કણકણ, ભમે દુર્ગંધ

દુઃખની લેખણી લખશે એક દી' સુખનો નિબંધ..!!



'દ' થી 'સ' ભણી કેડી…

આ

કુદરત પણ ગજ્જબ સાહિત્યપ્રેમી છે..! 

ગ્રાઉન્ડ પર

કેવા સુંદર અછાંદસ ફૂટી નીકળ્યા છે..

ક્યાંક

ટચૂકડી,

ત્રિપદી જેવી દૂર્વા તરવરે.. 

અને-

ડાળી ઓ પર સામસામે અવતરેલા નવાંકૂરો,

છંદબધ્ધ ગઝલની પંક્તિઓ જોઈ લો..!

ડાળખીઓ લહેરાય, જાણે લયબદ્ધ ગીતો..!

વચ્ચે…

..સગર્ભા ધરા
સળવળે 'લિલાશ'
..કથ્થઈ ખોળે

~ રાજુલ

આજે World Environment Day નિમિત્તે વાત એક નવજાત કુંપળની, લીલીછમ્મ શક્યતાની, નવીનક્કોર આશાની..

એવી તે બળતી બપોર

તગતગતાં તડકા કાંઈ એવાં વરસતાં કે

ઝીણી થાય આંખોની કોર

લથબથતી પીડાનાં લીરાં કાંઈ ફરફરે રે

વેઠ્યો ના જાયે આ તાપ

ટાઢા નિસાસા ખરે, ઉનાં મોતીડાં ઝરે

નેજવાને અખરતાં જાપ

વાયરો રજળતો, કકળતો જરીકને,આફુડો જાતો પડી..

મૂઈ આમ્રમંજરી- ભાવવિભોર!

અડતામાં ઓરમાયું લાગ્યું મુને આજ સખા

કહેવી આ વાતું કોને છાની

મુઠ્ઠીમાં ઓરેલાં ઓરતાં વસુક્યાં રે

કોરી હથેળી નિશાની

દુખિયારી આંખોની કોતરોમાં…

મારા

બિલ્ડિંગના કમ્પાઉંડમાં ઉભેલો 

શીતક પીપળો 

સાંજ પડે

કે

વધુ જોરશોરથી 

થનગનવા લાગે છે.. 

જાણે કે, 

સૂરજને 

ડિંગો દેખાડીને કહેતો હોય ,

"જોયું?

ફરી એક્વારતુ હારી ગયો !!"

~રાજુલ

વાગી જરાક ઠેસ અમથી, ત્યાં

સ્મરણોની પેટીમાં ઝીણી તિરાડ

ટપ્પ દેતાંકને થોડીક ક્ષણો બા'રે કૂદી પડી,આખા ઓરડામાં રાડારાડ..!

મૂવીમાં જોડે ખાધેલા પોપકૉર્ન શરમાયાં
ત્યાં નરીમાનપોઈન્ટનીપાળી પર મમળાવેલા સીંગચણા અકળાયાં
લ્યો,આમને તો લાગી આવ્યું હાડેહાડ..!

દરિયાની રેતીમાં આંગળી ફેરવતાં ઉપસેલા નામે દીધો સાદ, છું હું તને યાદ?
સ્તબ્ધ બનીને થીજી ગયેલ ક્ષણને ઝટપટ મેં કરી દીધી બાદ
હવે કેમ કરી વાસુ કમાડ..?

~રાજુલ ભાનુશાલી

તરસ ને પણ
'મોર્ડન' જમાનાનો રંગ લાગ્યો છે..!
એણેય
દોસ્તી કરી લીધી છે,
બીસલેરીની બોટલ
અને
ઠંડા પાણીના પાઊચ સાથે!!

-રાજુલ

શુક્રવારે સાંજના સૌથી વધુ પૂછાતો પ્રશ્ન : "શું પ્રોગ્રામ છે વીકએન્ડનો?'



સોમવારે સૌથી વધુ પૂછતો/ચર્ચાતો પ્રશ્ન/ટૉપીક: "ક્યાં ફરવા ગયા'તાં/શું કર્યું વીકએન્ડ માં?"



સોમ/મંગલવારે ફોન/ચૅટમાં સામાન્ય રીતે થતી ચર્ચા:

"મહેતાસ આ વખતે 'ફલાણી' જગ્યાએ ડીનર માટે ગયા'તા..કહેતા હતા કે ત્યાંનું ફૂડ A1 CLASS.. અને 'અલાણી' જગ્યાનો ગોલો કહેવું પડે હો BOSS..ક્યાંય નથી ખાધો એવો આલાગ્રાન્ડ ગોલો આજ સુધી..જલસો પડી ગ…

કાળઝાળ,આ

સૂર્યનો અહંકાર

દઝાડે સૃષ્ટિ!

- રાજુલ

તપ્ત બપ્પોર…

"તમે જ્યારે કોઈ એક પુસ્તક ખરીદો છો ત્યારે અડધો કે એક કિલોગ્રામ કાગળ નથી ખરીદતાં, પણ એક જીવન ખરીદો છો..!"
-અજ્ઞાત

શેક્સપીયરની જન્મ તારીખ અને મૃત્યુ તારીખ પણ ૨૩ અપ્રિલ છે.. આજ કારણે યુનેસ્કોએ ૨૩ અપ્રિલ ને “વિશ્વ પુસ્તક દિવસ” તરીકે ઉજવવાનું શરુ કર્યું..

વાંચન એ ધ્યાન અને યોગ જેટલી જ ગુણકારી પ્રવૃત્તિ છે.

સૌ શબ્દમિત્રોને 'વિશ્વ પુસ્તક દિવસ' નિમિત્તે ખોબો ભરીને શબ્દ લ્હાણી..

અચલા તુ,વિપુલા તુ,

તુ જ સાગરા, ઉર્વરા

કોટિ કોટિ મુજ વંદના 

હે જનની, હે વસુંધરા!

-

રાજુલ

ટાણે કટાણે
ઋતુ કરે સત્સંગ,
પ્રકૃતિ દંગ..!

-રાજુલ

આમ તો ગ્રીષ્મ એ પોતાના ચમકારા દિવસો પહેલા દાખવવા શરૂ કરી દીધા છે. વસંત ને તો એણે ક્યારની બાથમાં લઈ લીધી છે.. પણ ઓફીશીયલી આજે વાજતેગાજતે ગ્રીષ્મઋતુનું આગમન થયું.



ગ્રીષ્મ એટલે ધોમધખતા તાપની ઋતુ. એના વિશે શુ લખવું ? કહેવું ? ધોમધખતા તાપમાં તે વળી કઈ રસિકતા દર્શન થાય ! હા કેરીના રસના દર્શન વળી બરાબર છે ! વસંત વિશે તો પાના ભરી લખી શકાય.પણ ગ્રીષ્મ વિશે બહુ બહુતો આપણે શાળામાં “ઉનાળાની બપોર” નામનો નિબંધ લખતા ! તેથી વિશેષ બહુ ભેજું મેં તો ખપાવ્યું નહોતું ! આપે ખપાવ્યું…

અધૂરપ,

 એ તો..

 ઈચ્છાની તાસીર !!

 એને..

 'ગુણ' ગણવો,

 કે પછી 

 'અવગુણ' ??

-રાજુલ

હું હારી ગઈ,

હા..

કબૂલ કરું છું-

આજે 

હું હારી ગઈ,

તારા સ્નેહ સામે!!

જ્યારે મેં કહ્યું ,તારું નામ કેમ વિસરું?

એ તો કંઠસ્થ છે..

ને તે કહ્યું,

તારું નામ તો હ્રદયસ્થ છે..

ને

હું હારી ગઈ..!

-રાજુલ

તમને તારાઓની બારાખડી ઉકેલતાં આવડે છે?

- તો લખો.



તમને ફૂલોની પાંખડીમાં પ્રવેશતાં આવડે છે?

- તો લખો.



તમને ક્ષણની આંખડીમાં કશુંક આંજતાં આવડે છે?

- તો લખો.



તમને રણના વિષાદને મૃગજળથી માંજતાં આવડે છે?

- તો લખો.



તમને આંખમાં આવેલા વાદળને નહીં વરસાવતાં આવડે છે?

- તો લખો.



તમને મેઘધનુષને સુક્કી ધરતી પર…

મિત્રો, બગીચામાં સાંજે કદીક લટાર મારવા તો જતાં જ હશો..હ્રદય કેવું પ્રફુલ્લિત થઈ જાય નહીં? ખુશનુમા મોસમ, મનમોહક ફુલો, સુંદર રીતે કાપેલી લૉન, અદ્ ભુત આકાર અપાયેલી વાડ..



ઓહ !! કેટકેટલું !!



કેટલું નયનરમ્ય લાગે..પરંતુ આ સુંદરતા જાળવવા, વ્યવસ્થિત રાખવા અવારનવાર બગીચામાં "પ્રુનિંગ" કરવું પડે છે.નહીં તો બગીચો જંગલ બની જાય..!!



આપણા મનનું પણ કંઈક એવું જ છે. અડાબીડ ઉગી નીકળેલા વિચારો,અભિપ્રાયો,ઘર કરી ગયેલી સાચીખોટી…