1. તમારી સાહિત્યસફરની શરૂઆત કઈ રીતે થઇ? પ્રેરણાસ્રોત કોણ બન્યું?

જવાબ:સાહિત્યની સફર ફેસબુકથી થઇ એમ કહેવામાં મને જરા પણ છોજ નથી.મારુ કોઈ સાહિત્યિક બેકગ્રાઉન્ડ નથી.ક્યારેય પુસ્તકોનું ખાસ વાંચન કે ના હતું ઘરમાં એવું કોઈ વાતાવરણ.કવિતા એ મારા જીવનમાં થયેલો સૌથી મોટો અકસ્માત છે જેણે મારુ જીવન બદલી નાખ્યું એમ કહું તો જરાય ખોટું નથી.મને કોઈ કવિતાના જંગલમાં આંગળી પકડી લઇ આવ્યું અને પછી ત્યાં જ છોડી ગયું હંમેશ માટે.હું ત્યાં ભૂલી પડી ગઈ છું અને હવે હું આમ ભૂલ પાડવાનો આનંદ ભરપૂર ઉઠાવું છું પ્રેરણાસ્ત્રોત વિષે વાત કરું તો એ કોઈ વ્યક્તિ નથી.દુઃખ કે પીડાનું કારણ જ્ઞાન હોય છે આંસુનું કારણ પ્રેમ અને અજંપાનું કારણ ચેતના છે.કવિતા માટે જ્ઞાન,પ્રેમ અને ચેતના ત્રણેય કારણભૂત છે.એટલે એને તમે પ્રેરણાસ્ત્રોત કહી શકો.

2. આપના પ્રકાશિત પુસ્તકો, કાવ્યસંગ્રહ વિશે કહેશો...

મારા હજુ સુધી કોઈ પુસ્તક પ્રકાશિત નથી થયા. પણ હા, જાણીતા સાહિત્યિક સામાયિક જેવાકે પરબ,નવનીતસમર્પણ,વહી,કવિતા,કવિલોક,શબ્દસર,ગઝલવિશ્વ વગેરેમાં મારી અત્યાર સુધીની 60-70 જેટલી રચના પ્રકાશિત થઇ ચુકી છે. કાવ્યપઠનનો અનુભવ પણ ખરો.અત્યારના આ ડિજીટલયુગમાં પુસ્તક કરવું એ ઘણી અઘરી વાત છે,સિવાય કે તમારી કલમ અત્યંત ધારદાર હોય અને તમને વાંચવા લોકો ખર્ચ કરે એટલી તમારી ઓળખ અને લોકપ્રિયતા હોય તો જ પુસ્તક કરવાનો કોઈ અર્થ છે બાકી સ્વખર્ચે તું હું બેચાર દિવસમાં જ પુસ્તક પ્રકાશિત કરી દઉં પણ શો અર્થ ? મારે કોઈને ભેટ ધરવા માટે પુસ્તક નથી કરવું.એટલે જ્યાં સુધી પ્રકાશક ના મળે ત્યાં સુધી પુસ્તક પ્રકાશિત નહિ કરું એવો વિચાર મેં શરુઆથી જ કરેલો છે (જયારે હું શરૂઆતમાં મારી કવિતા લઈને એક પ્રકાશક પાસે ગઈ અને એણે એક પણ કવિતા વાંચ્યા વગર જ જવાબ આપ્યો "અમે ખાલી જાણીતા લેખક-કવિના જ પુસ્તક બનાવીએ છીએ ...એ દિવસથી મેં મનમાં ધારી લીધેલું કે મારુ પણ પુસ્તક થશે જ અને હું નહિ પ્રકાશક દ્વારા જ...એના માટે મેં પાછા વળીને જોયું નથી એટલી મહેનત કરી છે.) હવે એ સમય આવી ગયો છે અને મારુ પ્રથમ પુસ્તક ટૂંક સમયમાં પ્રકાશિત થશે અને મજાની વાત એ છે કે એ કવિતા નહિ પરંતુ મારી પ્રથમ નવલકથા છે.

3. સાહિત્યની આવતીકાલ આપની નજરે ...

જવાબ:સાહિત્યની આવતીકાલ મને તો ઘણી ઉજળી લાગે છે કારણકે ઈન્ટરનેટના કારણે વાચક વધારે વધારે સ્માર્ટ થતો જાય છે એટલે ચીલાચાલું ફેંકાઈ જવાનું અને સમૃદ્ધ કે ધારદાર સાહિત્ય જ બચી શકશે એવું મારુ માનવું છે.પણ,હા આવું સાહિત્ય લોકો સુધી પંહોચે એની જવાબદારી સાહિત્યકારોની અથવા પ્રકાશકોની છે-સિવાય કે કચરો સાહિત્ય પીરસ્યા કરે તો લોકોનો રસ પણ ઉઠી જાય.બાકી જેમ સિનેમા જગતમાં અત્યારે સ્માર્ટ મુવીઝ નો ટ્રેન્ડ છે એમ સાહિત્યમાં પણ આવશે એમ હું માનું છું અને હા સાહિત્યમાં સત્તા હાથમાં લઈને બેસી ગયેલા કોઈના પણ હાથમાં એ દોરી લાંબો સમય ટકવાની નથી.

4. યુવા સાહિત્યને કેવા માર્ગદર્શનની જરૂર છે? 

યુવા પેઢી ખુબ સ્માર્ટ છે સારું કે ખરાબ સમજે જ છે.સાહિત્ય ક્યારેય રૂઢિગત હતું જ નહિ કે હોય જ ના શકે.નવીનતા કે મૌલિકતા એ જ કવિતા છે એમ હું માનું છું.જેની પાસે મૌલિકતા છે એ જ ટકી રહેશે ભલે એ 16 વર્ષનો કવિ હોય કે 60 વર્ષનો કવિ હોય એની કવિતા યુવાન હોવી જોઈએ..!!

5. આપના જીવનના યાદગાર પ્રસંગ જે કાયમ માટે છાપ મૂકી ગયા ?

જવાબ:હા કેટલીક એવી ઘટનાઓ ઘટી ગઈ કે જેને હું ટર્નિંગ પોઇન્ટ કહીશ ચોક્કસ.પણ,એ કઈ ઘટના હતી એ તો તમારે મારા કાવ્યોમાંથી તાગ કાઢવો પડે અથવા આત્મકથા લખું ત્યાં સુધી રાહ જોવી પડે... ;) :) અત્યંત સંવેદનશીલ સ્વભાવ,વિદ્રોહી મિજાજ મને કવિતા કરવા પ્રેરે છે ઉપરાંત કુદરતને જોવાની જિજ્ઞાસાવૃત્તિ મને કવિતા આપી જાય છે.સારી કવિતામાં વિજ્ઞાન (વિશેષ જ્ઞાન) પણ જરૂરી છે.અને હું વિજ્ઞાનની વિદ્યાર્થીની પણ ખરી.બાકી અવગણના,અન્યાય,નિષ્ફળતા જેવી કેટલીય બાબતો છે જે મને કવિતા સુધી લઇ જાય છે.કવિતા મને મારી આધ્યાત્મિકતા સુધી લઇ જાય છે જે મને મારા હોવાનો અર્થથી સભર કરે છે.બાકી મારી નવલકથા એ મારો સૌથી વધુ યાદગાર પ્રસંગ છે એમ હું કહીશ કારણકે મેં એને મારી કલ્પનાઓની દુનિયામાં જીવંત થઈને લખી છે..!

6. ક્યા લેખક મિત્રને વાંચવાની મજા આવે?

જવાબ:પન્નાલાલ પટેલ,અશ્વની ભટ્ટ,કુન્દનિકા કાપડિયા ,પન્ના નાયક,મનીષા જોશી,અમૃતા પ્રીતમ,યોગેશ જોશી,વિપિન પરીખ...યુવાકવિમિત્રોમાં નીરવ પટેલ,કુલદીપ કારિયા,અનંત રાઠોડ,ભાવેશ ભટ્ટ.જય વસાવડા અનેક ગુજરાતીઓની જેમ મને પણ પ્રિય છે.

7. ભાષા અને સાહિત્યને કેવી રીતે મૂલવો છો?

જવાબ: તમે તમારી કોઈ પણ વાતને તમારી માતૃભાષામાં શ્રેષ્ઠ રીતે રજુ કરી શકો એમ હું માનું છું.મારા બાળકો અંગ્રેજી માધ્યમમાં ભણતા હોવા છતાં જો એ કવિતા લખશે તો એ ગુજરાતીમાં જ હશે એવો મને વિશ્વાસ છે.એટલે મને ભાષા એ કોઈ ચિંતાનો વિષય લાગતો નથી.ભાષા છે અને રહેશે જ એવો વિશ્વાસ છે.

8. સ્ત્રી, પ્રોફેશન અને પરિવાર...

જવાબ: સ્ત્રી એ મેનેજમેન્ટ ગુરુ છે મલ્ટીટાસ્કર છે.એટલે એના માટે બધું જ શક્ય છે.એ બધું બેલેન્સ રાખી શકે એટલી ક્ષમતા હોય જ છે એનામાં.અને હું રાખી શકી છું એનો મને આનંદ છે.જયારે તમે કંઈક મેળવવાની જીદપર ઉતરી આવો ત્યારે બધું આપમેળે તમારા પક્ષમાં આવી જાય છે.કવિતા મને જે શક્તિ આપે છે એના થકી જ હું બેલેન્સ કરી લઉં છું.